चन्द्रपुर,२८ जेठ ।
जिल्लाको चन्द्रपुर नगरपालिका–४ मा आइतबार प्रहरीले एकथान पेस्तोल र गोली बरामद गरेको छ ।
स्थानीयले सूचना दिएपछि पुगेको प्रहरीले बेवारिसे अवस्थामा पेस्तोल फेला पारेको हो ।
हतियार देखिएको सूचना पाएलगत्तै ईलाका प्रहरी चन्द्रनिगाहपुरबाट प्रहरी निरीक्षक सुरेन्द्र विक्रम बर्तौलाको कमाण्डको टोली चन्द्रपुर–४ स्थित मुस्लीमटोल नजिक पुगेर बाटोमा फ्याँकिएको अवस्थामा एकथान पेस्तोल र गोली बरामद गरेको हो । स्थानीय मोहम्मद अफरोज आलमले आफ्नै घरसँगै जोडिएको श्रीनिवास पटेलको खाली जमिन सफा गर्ने क्रममा झाडीमा सिमेन्टको बोराले बेरेर राखेको कटुवा पेस्तोल देखेपछि प्रहरीलाई खबर गरेका थिए । बोराभित्रको पेस्तोलमा गोली लोड गरिएको अवस्था भेट्टिएको प्रहरीले जनायो ।
ईलाका प्रहरी चन्द्रनिगाहपुरका डीएसपी गौरव महतले हतियार कसको भन्ने अहिलेसम्म खुल्न नसकेको बताए । ‘हामी अनुसन्धान गर्दैछौं,’ उनले भने, ‘एक साताअघि कसैले हतियार ल्याएर फालेर भागेको हुन सक्छ ।’ प्रहरीले हतियार बरामदी मुचुल्का गरी कार्यालयमा ल्याएको छ । प्रहरीले हतियारबारे केही स्थानीयसित सोधपुछ गरेको थियो ।
