रुपेन्द्र पटेल १८ असोज / अवैध लागु औषध सहित रौतहट प्रहरीले एक जनालाई पक्राउ गरेको छ । लागु औषध सहित जिल्लाको गौर नगरपालिका वडा नम्बर ६ सवगाढाका राकेश शाह भनिने जगरनाथ शाहलाई पक्राउ गरिएको प्रहरीले जनाएको छ । जिल्ला प्रहरी कार्यालय गौर र प्रहरी चौकी सुकदेव चौकबाट खटेको प्रहरी टोलीले यमुनामाई गाउँपालिका वडा नम्बर १ सुकदेव चौकबाट शाहलाई हिजो पक्राउ गरेको हो । शंकास्पद सवारी साधन तथा पैदल यात्रीहरुलाई चेकजाँच गर्ने क्रममा पैदल हिडीरहेको अवस्थामा शंका लागि चेक जाँच गर्दा शाहले शरीर र झोलामा लुकाएर राखेको लागु औषध फेला परेको प्रहरी कार्यालय गौरले जनाएको छ । पक्राउ परेका शाहलाई प्रहरी हिरासतमा राखिएको र यस विषयमा थप अनुसन्धान भईरहेको रौतहटका प्रहरी उपरिक्षक एसपी भुपेन्द्र खत्रीले जानकारी दिनुभयो ।
