जनकपुर, ३ असोज । : प्रदेश २ का भौतिक पुर्वाधार विकासमन्त्री रामसरोज यादवले भोजपुरी अश्लिल तथा दोहोरो अर्थ लाग्ने गीतमा नाचेको भिडियो भाइरल बनेको छ ।
पार्टीका अन्य नेताहरुसँगै भोज खानपिन गरि उनले नाचेको भिडियो भाइरल बनेको हो ।
‘कोरा में सट के उलट के पलट के, देले बाड देहिया तुर हो, बिजली के तार में भातार अझूरईल, मने मन कईल मजबूर हो’ भन्ने गीतमा उनको डान्स फेसबुक, टिकटक लगायतका समाजिक संजालमा भाइरल भएको हो ।
काँग्रेस संसदीय दलका नेता समेत रहेका मन्त्री यादव निकट एक नेताका अनुसार उनले नाचेको यो भिडियो जनकपुरस्थित होटेल राजदरबारको हो ।
‘३/४ महिनाअघि एउटा वैवाहिक कार्यक्रममा भोजभातपछि साथीभाईको आग्रहमा उहाँले नाच्नु भएको थियो,’ उनले भने ।
नेपाली काँँग्रेस पार्टीमा आबद्ध जनकपुरका डा. सज्जन ठाकुर लगायत पार्टीका अरुपनि कार्यकर्ता तथा नेताहरुसित नेता यादव झुम्दै नाचेका हुन् ।
वैवाहिक कार्यक्रममा सहभागी भएका बखत नाच्नु समान्य रहेपनि उनले नाचेको गीतका कारण समाजिक संजालमा उनको आलोचना भएको हो ।
‘जनताको प्रतिनिधि भइसकेपछि उनको जिवन व्यक्तिग हुँदैन्, सार्वजनिक हुन्छ । किनकी उहाँसँग धेरै जनता जोडिएको हुन्छ । त्यसैले उहाँहरुको क्रियाकलाप, गतिविधि र बोलीले धेरै प्रभाव पर्छ,’ बुद्धिजिवी राकेश साहले भने, ‘उत्सव वा खुशीको क्षणमा नाच्नु समान्य हो । तर जसले भाषणमा मिथिला संस्कृतिको कुरा कहिल्यै छुटाउँदैन उनले यस्तो अश्लिल गीतमा नाचेर अश्लिलतालाई बढाबा दिएको समाजमा सन्देश जान्छ ।’
जहाँ भोजपुरी अश्लिल र दोहोरो अर्थ लाग्ने गीतको विरोध हुँदै आएको छ त्यसलाई मन्त्री यादवले बढाबा दिएको बुद्धिजिवी साहको भनाई छ । यसबारे प्रतिक्रियाका लागि सम्पर्क गर्न खोज्दा मन्त्री यादवसंग सम्पर्क हुन सकेन् ।
