रौतहटको कटहरिया नगरपालिका–९ डुमरिया स्थित ज्योति डिस्टिलरीमा मेसिन विस्फोट हुँदा एकजना कामदारको ज्यान गएको छ भने अन्य छ जना घाइते भएका छन्।
आज बिहान डिस्टिलरीभित्र सञ्चालनमा रहेको मेसिन अचानक पड्किँदा सोही स्थानका कामदार लक्ष्मण यादवको घटनास्थलमै मृत्यु भएको इलाका प्रहरी कार्यालय गरुडाले जनाएको छ। विस्फोटमा परेर अन्य छ जना कामदार गम्भीर रूपमा घाइते भएका छन्।
घाइतेहरूको अवस्था बुझ्न स्थानीय स्वास्थ्य संस्थामा उपचार भइरहेको छ। उनीहरूको स्वास्थ्य अवस्थाबारे थप विवरण आउन बाँकी रहेको प्रहरीले जनाएको छ।
जिल्ला प्रहरी कार्यालय रौतहटका अनुसार घटनाको कारणबारे अनुसन्धान भइरहेको छ। विस्फोट किन र कसरी भयो भन्ने विषयमा प्राविधिक टोलीसहित थप छानबिन अगाडि बढाइएको र घटनाको विस्तृत विवरण आउन बाँकी रहेको प्रहरीको भनाइ छ।
