बारा,८ पुस / बारामा यस वर्ष धान उत्पादनमा कमी आएको कृषि ज्ञान केन्द्रले जनाएको छ ।
समयमा पानी नपर्नु, रासायनिक मलखादको अभाव र फौजी किराको आक्रमण जस्ता कारणले कृषकले लगाएको चैते, भदैया, अगहनी धानको उत्पादनमा ५० प्रतिशत कमी आएको ज्ञान केन्द्रका प्रमुख जितेन्द्र यादवले जानकारी दिए ।
यो वर्ष चैते १२ हजार ११३ हेक्टर, भदैया धान ११ हजार ९३० हेक्टर र अगहनी धान ३४ हजार १६३ हेक्टरसमेत गरी कूल ५८ हजार २०६ हेक्टर क्षेत्रफलमा धान खेती भएको थियो । उक्त क्षेत्रफलमा एक लाख ३७ हजार ६२६ दशमल ३२ मेट्रिक टन धान उत्पादन भएको ज्ञान केन्द्रले जनाएको छ । प्रतिक्विन्टल दुई हजार २०० रुपैयाका दरले उक्त धान तीन अर्ब दुई करोड ७७ लाख ७९ हजार रुपैयाको रहेको कृषि प्राविधिक गेनालाल मण्डलले जानकारी दिए । गत आर्थिक वर्ष चैते धान १२ हजार २२५, भदैया धान ११ हजार ९२५ र अगहनी धान ३८ हजार ५५० समेत गरी कूल ६२ हजार ७०० क्षेत्रफलमा लगाएको हुंदा पांच अर्ब ८८ करोड ५० लाख १९ हजार १४० रुपैया बराबरको २२ लाख ६७ हजार ५०० दशमलव ८७ मेट्रिक टन धान उत्पादन भएको कृषि ज्ञान केन्द्रको कार्यालयले जनाएको छ । नगदे बालीका रूपमा उखु खेती र माछा पालनतिर किसान बढी केन्द्रित भएको हुंदा धान उत्पादनमा कमी आउने गरेको ज्ञान केन्द्रका प्रमुख यादवले बताए ।
