रौतहट, ८ चैत — पानी भर्नु सामान्य काम हो, तर त्यही कामले ज्यानै लैजाला भन्ने कसले सोचेको थियो र? रौतहटको चन्द्रपुर नगरपालिका–८, बसन्तपुरमा करेन्ट लागेर ८४ वर्षीया कान्छी देवी चौधरीको दुःखद् मृत्यु भएको छ।
छोरी–ज्वाइँको घरमा बस्दै आएकी चौधरी आइतबार दिउँसो धारामा पानी भर्ने क्रममा अचानक करेन्ट लागेर गम्भीर घाइते भएकी थिइन्। हतार–हतार उपचारका लागि चन्द्रपुर हस्पिटल प्रालिमा लगिए पनि चिकित्सकले बचाउन सकेनन्।
घटना यत्तिकै सकिएन, प्रश्न पनि छोडेर गयो—धारामा करेन्ट कसरी आयो? लापरबाही कसको?
प्रहरीका अनुसार पोस्टमार्टमपछि शव मृतकका छोरा जोखन चौधरीलाई बुझाइएको छ। जिल्ला प्रहरी कार्यालय रौतहटका प्रवक्ता डीएसपी विष्णु प्रदीप बस्यालका अनुसार घटनाबारे थप अनुसन्धान जारी रहेको छ।
स्थानीय तहको लापरबाही हो कि प्राविधिक कमजोरी—अब सत्य बाहिर आउला कि फेरि यस्तै घटना दोहोरिएपछि मात्रै आँखा खुल्ने हो?
