रौतहट,२१ वैशाख ।
देशका विभिन्न सहरमा ‘डोजर अभियान’ले तीव्रता लिइरहेका बेला चन्द्रपुर नगर क्षेत्रमा पनि सार्वजनिक जमिन अतिक्रमण हटाउन स्थानीय स्तरमा जोडदार आवाज उठ्न थालेको छ। राजधानीमा देखिएको कडाइ अब चन्द्रपुरमा कहिले देखिन्छ भन्ने प्रश्न यहाँका बासिन्दाबीच पेचिलो बन्दै गएको छ।
नगर क्षेत्रभित्रका नहर छेउका बस्ती, चन्द्रनिगाहपुर हाटबजारको जमिन, टेकानदेखि झनझने टोलसम्म फैलिएको पुरानो राजकुलो क्षेत्र तथा नुनथरमा बनेका अव्यवस्थित घर–टहराहरू सार्वजनिक जग्गा अतिक्रमणको मुख्य उदाहरणका रूपमा अघि सारिएका छन्। स्थानीयका अनुसार यी क्षेत्रहरूमा वर्षौंदेखि क्रमशः अतिक्रमण बढ्दै जाँदा सार्वजनिक उपयोगका संरचना नै संकटमा पर्न थालेका छन्।
विशेषगरी राजकुलो क्षेत्रको अतिक्रमणले सिँचाइ र पानी निकास प्रणालीमा असर पर्ने जोखिम बढेको भन्दै चिन्ता व्यक्त गरिएको छ। हाटबजार क्षेत्र साघुरिँदै जाँदा स्थानीय व्यापार–व्यवसायमा समेत प्रत्यक्ष प्रभाव परेको व्यापारीहरूको गुनासो छ। नहर किनारमा अनियन्त्रित बसोबास बढ्दा बाढी र डुबानको जोखिमसमेत बढ्न सक्ने सरोकारवालाहरू बताउँछन्।
यता, युवापुस्ताले सामाजिक सञ्जालमार्फत यो मुद्दालाई थप चर्काएका छन्। चन्द्रनिगाहपुरका युवा झलक श्रेष्ठले नगरपालिकाले सार्वजनिक जमिन संरक्षणमा चासो नदिएको भन्दै फेसबुकमार्फत कडा टिप्पणी गरेका छन्। “सार्वजनिक सम्पत्ति जोगाउनु स्थानीय सरकारको पहिलो जिम्मेवारी हो,” उनले लेखेका छन्।
त्यस्तै अर्का युवा सोम गुरुङले अतिक्रमण भएका स्थानहरूको भिडियो सार्वजनिक गर्दै तत्काल हटाउनुपर्ने माग अघि सारेका छन्। उनको पोस्टले पनि सामाजिक सञ्जालमा व्यापक प्रतिक्रिया पाइरहेको छ। स्थानीय युवाहरूको यस्तो सक्रियताले मुद्दालाई सडकबाट डिजिटल प्लेटफर्मसम्म पुर्याएको देखिन्छ।
तर, यस विषयमा चन्द्रपुर नगरपालिकाको स्पष्ट धारणा भने अझै सार्वजनिक हुन सकेको छैन। स्थानीयको भनाइमा, नगरपालिकाले समस्या देखे पनि ठोस कदम चाल्न ढिलाइ गरिरहेको छ। “अतिक्रमण बढ्दै जाँदा प्रशासन मौन देखिन्छ,” एक स्थानीयले गुनासो गरे।
स्थानीयवासीहरू अब चन्द्रपुरमा पनि ‘डोजर मोडल’ लागू हुने अपेक्षामा छन्। तर, त्यसका लागि राजनीतिक इच्छाशक्ति, प्रशासनिक तयारी र स्थानीय सहकार्य अनिवार्य हुने जानकारहरू बताउँछन्। अन्यथा, सार्वजनिक जमिनको संरक्षण केवल सामाजिक सञ्जालको बहसमा सीमित हुने खतरा बढ्दै जाने उनीहरूको चेतावनी छ।
तस्बिर एआईबाट सिर्जित
