राजनीति गर्न भन्दै संघर्षमा लागेका उनलाई पक्राउ गरेर डाँका मुद्दामा जेल हालियो, ७ वर्षपछि छुटेर आउँदा श्रीमती घर छाडेर अन्तै गइसकेकी थिइन् । एक्लिएका उनले पुनः राजनीतितिर वास्ता राखेनन् । गोपालको हालत ४५ वर्ष पहिलेकै जस्तो छ ।
चितवन — गोपाल भनेर चिनिने उनको नागरिकताको नाम हो गोफले प्रजा । प्रजा अर्थात् चेपाङ समुदायको बसोबास क्षेत्र चितवनको पहाडी गाउँ मायाटारमा छ उनको घर । भरतपुरभन्दा केही चिसो भएकाले खडेरी परे पनि मायाटारमा मकै ओइलाएका छैनन् । हालैको एक दिन मकैबारीको आलीमा टुक्रुक्क बसेर गोपाल घुँडामा टाउको राखेर निदाइरहेका थिए ।
उल्टो पारेर लगाएको निकै पुरानो टोपी, कुममा धुजाधुजा भएको पुरानो टिसर्ट । पुरानो मैलो अस्कोट लगाएकाले टिसर्टका अरू धुजा छोपिएका थिए । खुर्पेटोको डोरीले कम्मर कसेका उनको कम्मरमुनिको पहिरनको पनि उस्तै बिजोग थियो । ठाउँठाउँमा टालेको र टाल्न नभ्याएका भ्वाङहरू भएको सुरुवाल लगाए पनि खुट्टा खाली नै थिए । पहिरनले नै उनका दुःख दर्शाइरहेका थिए ।
