रौतहट, ६ माघ — चर्चित पत्रकार तथा रिपोर्ट्स क्लब नेपालका अध्यक्ष ऋषि धमलाले रौतहट क्षेत्र नम्बर ४ बाट प्रतिनिधिसभा सदस्यका लागि उम्मेदवारी दिने भएका छन्। उनले आम जनता पार्टीको तर्फबाट ‘मोबाइल’ चुनाव चिन्ह लिएर उम्मेदवारी दर्ता गर्न लागेका हुन्।
मनोनयन दर्ताका लागि धमला आज बिहानै काठमाडौँबाट रौतहट आइपुगेका छन्। जिल्ला निर्वाचन कार्यालयमा आजै आफ्नो मनोनयन दर्ता गराउने कार्यक्रम रहेको जनाइएको छ। सञ्चारकर्ममा लामो समय बिताएका धमलाले देशको राजनीति, सुशासन र विकासका मुद्दालाई नजिकबाट बुझ्ने अवसर पाएको भन्दै त्यसैको अनुभवलाई जनताको सेवामा लगाउने उद्देश्यसहित आफू चुनावी मैदानमा उत्रिएको बताएका छन्।
रौतहट क्षेत्र नम्बर ४ मा शिक्षा, स्वास्थ्य, पूर्वाधार विकास, रोजगारी र सुशासन मुख्य चुनौतीका रूपमा रहेको उल्लेख गर्दै धमलाले यी विषयलाई प्राथमिकतामा राखेर काम गर्ने प्रतिबद्धता व्यक्त गरेका छन्। “जनताका समस्या संसदमा पुर्याउने र समाधानका लागि दबाब सिर्जना गर्ने मेरो मुख्य लक्ष्य हो,” उनले बताएका छन्।
धमलाको उम्मेदवारीसँगै रौतहट–४ को चुनावी प्रतिस्पर्धा थप रोचक बन्ने देखिएको छ। यस क्षेत्रमा यसअघि नै विभिन्न ठूला दलका उम्मेदवार मैदानमा उत्रिसकेका छन्। नयाँ अनुहारका रूपमा पत्रकार पृष्ठभूमिबाट आएका धमलाले मतदाताको ध्यान आकर्षित गर्ने अपेक्षा गरिएको छ।
आम जनता पार्टीले भ्रष्टाचारविरुद्धको अभियान, पारदर्शी शासन प्रणाली र जनमुखी विकासलाई आफ्नो मूल एजेन्डा बनाउँदै आएको छ। पार्टीका नेताहरूले ऋषि धमलाको उम्मेदवारीले पार्टीलाई रौतहटमा नयाँ ऊर्जा मिल्ने विश्वास व्यक्त गरेका छन्।
मनोनयन दर्तापछि धमलाले क्षेत्रका विभिन्न स्थानमा मतदातासँग भेटघाट तथा चुनावी कार्यक्रमलाई तीव्रता दिने तयारी गरेका छन्।
