रुपेन्द्र पटेल
चन्द्रपुर, २९ साउन ।
रौतहटमा समुदायस्तरमै कोरोना संक्रमित धमाधम भेट्न थालेपछि रौतहटमा त्रास फैलिएको छ । रौतहटको समुदायस्तरमा कोरोना पुष्टि हुन्थालेपछि रौतहटका स्थानिय वासिन्दा त्रसित बनेका छन् । केही दिनयता रौतहटको राजदेवी, कटहरिया र गरुडा नगरपालिकामा दर्जनौं मानिसमा कोरोना संक्रमण देखिएपछि जिल्लामा त्रासको वातावरण देखिएको छ । गत सोमबार कटहरिया नगरपालिकाका नौ जनामा कोरोना संक्रमण पुष्टि भएको थियो । कोरोना संक्रमण पुष्टि भएपछि कटहरियामा पनि त्रास देखिएको छ । स्थानीयबासीमा निकै सजगता अपनाएको छ । यसैगरी, मंगलबार रौतहटको गरुडामा ११ जनामा कोरोना संक्रमण पुष्टि भएको छ । संक्रमित हुनेमा दुईजना स्वास्थ्यकर्मी पनि रहेका छन् । बाँकी नौ जना सर्वसाधारण हुन् । यस्तै जिल्लाको उतरी भेगमा रहेको चन्द्रपु नगरपालिकामा पनि समुदायस्तरमै कोरोना देखा पर्न थालेका छन् । चन्द्रपुर नगरपालिकामा ५ जनामा कोरोना संक्रमण पुष्टि भएको छ । चन्द्रपुर क्षेत्रमा संक्रमण देखिएपछि संक्रमितहरु संग जोडिएका अरुमा पनि कोरोना भाइरस हुन सक्ने र समाजमा फैलाउन सक्ने स्थानीयमा चिन्ता बढदै गएको हो ।
