काठमाडौं। देशमा पश्चिमी वायुको आंशिक प्रभाव कायमै रहेकाले आज (माघ १९) अधिकांश स्थानको मौसम सामान्यतया आंशिक बदलीदेखि सफा रहने मौसम पूर्वानुमान गरिएको छ।
मौसम पूर्वानुमान महाशाखाका अनुसार पहाडी तथा हिमाली भू–भागमा बिहान र बेलुका चिसो बढ्ने सम्भावना रहेको छ। उच्च हिमाली क्षेत्रमा हल्का हिमपातको सम्भावना भने न्यून रहेको जनाइएको छ।
तराईका केही भू–भागमा बिहानको समयमा हुस्सु र कुहिरो लाग्ने देखिएको छ, जसका कारण हवाई तथा सडक यातायातमा आंशिक असर पर्न सक्ने भएकाले सतर्कता अपनाउन अनुरोध गरिएको छ।
काठमाडौं उपत्यकासहित मध्य पहाडी क्षेत्रमा दिउँसोको तापक्रम सामान्य रहने तर बिहान–बेलुका चिसो महसुस हुने अनुमान छ। पश्चिम नेपालका केही पहाडी क्षेत्रमा आंशिक बदली रहन सक्ने भए पनि उल्लेख्य वर्षाको सम्भावना छैन।
मौसमविद्हरूका अनुसार हाल चिसो मौसम कायम रहने भएकाले बालबालिका, ज्येष्ठ नागरिक तथा दीर्घरोगीहरूलाई विशेष सावधानी अपनाउन सुझाव दिइएको छ।
