रौतहट, २० माघ — नेपाली कांग्रेसबाट प्रतिनिधि सभा सदस्यका उम्मेदवार देवप्रसाद तिमल्सिनाले रौतहट क्षेत्र नम्बर ४ मा चुनावी गतिविधि तीव्र पारेका छन्। लगातार दुई अवधिसम्म यस क्षेत्रको प्रतिनिधित्व गरिसकेका तिमल्सिना आज चन्द्रपुर नगरपालिका–५ मा घरदैलो कार्यक्रममा सहभागी भए। स्थानीय मतदातासँग प्रत्यक्ष सम्पर्क गर्दै उनले विगतका कामहरूलाई निरन्तरता दिन फेरि एकपटक अवसर दिन आग्रह गरे।
घरदैलोका क्रममा तिमल्सिनाले आफ्नो प्रमुख चुनावी एजेन्डा प्रस्तुत गर्दै क्षेत्रको विकासलाई दीर्घकालीन योजना र स्थायी संरचनासँग जोडेर अघि बढाउने प्रतिबद्धता जनाए। उनका अनुसार अघिल्लो कार्यकालमा विभिन्न कारणले अपूरा रहेका योजनाहरूलाई पूरा गर्नु अहिलेको प्राथमिकता हो। उनी विशेष रूपमा सडक पूर्वाधार, सिंचाइ व्यवस्था, स्वास्थ्य तथा शिक्षा सेवामा सुधार, कृषि उत्पादन वृद्धिका कार्यक्रम र युवा रोजगारी सम्बन्धी योजनालाई आफूले प्राथमिकतामा राखेको बताउँछन्।
तिमल्सिनाले विशेष रूपमा चन्द्रपुर क्षेत्रलाई जोड्ने मुख्य सडकहरू विस्तार तथा मर्मत, दुर्गम बस्तीमा सहज यातायात सुविधा, र वर्षैभरि उपयोग गर्न सकिने गरी खेतबारीमा पानी पुग्ने सिंचाइ संरचनाको विकासलाई प्राथमिक परियोजनाका रूपमा अघि सारे। उनका अनुसार सिंचाइको अभावले कृषि क्षेत्र प्रभावित भएकाले आधुनिक प्रविधि, मल–बियूको पहुँच र कृषि बजार विस्तार जस्ता विषयहरूलाई पनि समेटेर योजना तयार गरिएको छ।
स्वास्थ्य क्षेत्रमा, चन्द्रपुर–गौर करिडोरका बासिन्दालाई लक्षित गर्दै अत्यावश्यक सेवा उपलब्ध गराउनेगरी स्वास्थ्य चौकी तथा अस्पताल विस्तारका पहल निरन्तर गरिने उनले प्रतिबद्धता व्यक्त गरे। स्थानीय विद्यालयहरूको पूर्वाधार सुधार, प्राविधिक शिक्षाको पहुँच बढाउने तथा छात्रवृत्ति कार्यक्रम मजबुत पार्ने विषय पनि उनका मुख्य एजेन्डामा परेका छन्।
युवाहरूका लागि रोजगारी तथा सीप विकास कार्यक्रम तिमल्सिनाले जोड दिएको अर्को क्षेत्र हो। वैदेशिक रोजगारीमा निर्भरता घटाउन स्थानीय स्तरमै उद्योग, उद्यम र सहकारीहरूलाई प्रवर्द्धन गर्नेगरी योजना अघि सार्ने उनले बताए। साथै, वातावरण संरक्षण तथा बाढी–डुबान नियन्त्रणमा दीर्घकालीन समाधान खोज्ने प्रतिबद्धता पनि उनका एजेन्डामा छ।
मतदातासँग प्रत्यक्ष संवादमा तिमल्सिनाले भने, “यस क्षेत्रका विकासका धेरै कामहरू सुरु भएका छन्, अझै केही अधुरा छन्। ती पूरा गर्न तपाईंहरूको समर्थन आवश्यक छ।”
घरदैलोमा सहभागी स्थानीय बासिन्दाले आफ्ना समस्या र अपेक्षाहरू उम्मेदवारसमक्ष राख्दै आगामी प्रतिनिधिले दीगो र जवाफदेही विकासमा ध्यान दिनुपर्नेमा जोड दिए।
