काठमाडौं । नेदरल्याण्ड्सका वैज्ञानिकहरूले लामखुट्टे मार्ने एक अनौठो तर रोचक उपाय फेला पारेका छन् — गीत बजाएर।
‘एक्टा ट्रोपिका’ जर्नलमा प्रकाशित एक अध्ययन अनुसार अमेरिकी गायक स्क्रिलेक्सको १५ वर्ष पुरानो गीत “Scary Monsters and Nice Sprites” बजाउँदा लामखुट्टेहरू विचलित हुने र रगत पिउन तथा प्रजनन गर्न छोड्ने पाइएको छ।
यो प्रयोगले डेंगु र जिका भाइरसजस्ता रोगहरूको संक्रमण फैलिनबाट रोकथाम गर्न मद्दत गर्न सक्ने वैज्ञानिकहरूको दाबी छ।
एडिज एजिप्टी लामखुट्टेमा गरिएको परीक्षण
अनुसन्धान टोलीले एडिज एजिप्टी प्रजातिका लामखुट्टेहरूमा परीक्षण गरेको थियो।
तिनीहरूले भोका लामखुट्टे भएको पिंजडामा ह्याम्स्टर राखेर दुई वातावरण तयार पारे —
- एउटा शान्त कोठा
- अर्कोमा स्क्रिलेक्सको गीत बजाइएको कोठा
परिणाममा, शान्त कोठामा रहेका लामखुट्टेहरूले करिब ३० सेकेन्डमै ह्याम्स्टरलाई आक्रमण गरे भने, गीत बजिरहेको कोठामा लामखुट्टेहरू निकै ढिलो आक्रमण गर्न पुगे।
संगीतले कसरी असर गर्छ ?
वैज्ञानिकहरूका अनुसार लामखुट्टेहरू पखेटाबाट उत्पन्न ध्वनि मिसाएर आपसमा “कुराकानी” गर्छन्। तर, स्क्रिलेक्सको तीव्र इलेक्ट्रोनिक संगीतले ती ध्वनि तरंगहरूमा अवरोध पुर्याउँछ, जसका कारण लामखुट्टेहरू भ्रमित हुन्छन् र भेटघाट वा आक्रमण गर्न सक्दैनन्।
अनुसन्धानकर्ताहरूको भनाइमा, यदि यो विधि व्यावहारिक रूपमा सफल भयो भने यसले संसारभरका लाखौं मानिसको जीवन बचाउन सक्छ र लामखुट्टेमार्फत फैलिने रोगहरूको रोकथाममा नयाँ मार्ग खुल्न सक्छ।
