चन्द्रपुर,१९ भदौ ।हाल मनसुनको न्यून चापीय रेखा सरदरको स्थानभन्दा दक्षिणतिर अवस्थित छ । यसैका कारण आज दिउँसो र राति देशभर मौसममा परिवर्तन देखिने प्रक्षेपण गरिएको छ ।
कोशी प्रदेश : भारी वर्षाको जोखिम
राति कोशी प्रदेशका धेरै स्थानमा बदली रहनेछ । पहाडी भू-भागका एक-दुई स्थानमा भारी वर्षा हुने सम्भावना भएकाले पहिरो तथा बाढीको जोखिम बढ्न सक्ने चेतावनी जारी गरिएको छ ।
मधेश प्रदेश : हावाहुरी र वर्षाको सम्भावना
मधेश प्रदेशका केही स्थानमा दिउँसो हावाहुरी चल्ने अनुमान गरिएको छ । साथै राति साधारण बदली रहँदा थोरै स्थानमा मध्यम वर्षा पनि हुने सम्भावना छ ।
बागमती प्रदेश : मध्यमदेखि भारी वर्षा
दिउँसो र राति दुवै समयमा बागमती प्रदेशका धेरै स्थानमा वर्षा हुने सम्भावना छ । पहाडी भू-भागका केही स्थानमा भारी वर्षा पनि हुन सक्ने भएकाले सतर्क रहन अनुरोध गरिएको छ ।
गण्डकी प्रदेश : वर्षा र भारी पानीको खतरा
गण्डकी प्रदेशका धेरै स्थानमा दिउँसो मध्यम वर्षा र राति निरन्तर बदली हुने अनुमान गरिएको छ । पहाडी क्षेत्रमा भारी वर्षा पर्न सक्ने भएकाले विपद् व्यवस्थापनमा ध्यान दिनुपर्ने महाशाखाले जनाएको छ ।
लुम्बिनी प्रदेश : तराईमा हावाहुरी, पहाडमा वर्षा
लुम्बिनी प्रदेशको तराई क्षेत्रमा दिउँसो हावाहुरी चल्ने सम्भावना छ । साथै पहाडी क्षेत्रमा मध्यम वर्षा हुने अनुमान गरिएको छ ।
कर्णाली र सुदूरपश्चिम : थोरै स्थानमा वर्षा
कर्णाली र सुदूरपश्चिम प्रदेशका थोरै स्थानहरूमा मध्यम वर्षा हुने सम्भावना छ । बाँकी भू-भागमा आंशिक बदली मात्र रहने अनुमान गरिएको छ ।
